Pesca presenta ás grandes compañías de distribución a marca PescadeRías

A Conselleira de Pesca e Asuntos Marítimos, Carmen Gallego Calvar, e o director xeral de Estruturas e Mercados da Pesca, José Manuel López Rodríguez, mantiveron unha xuntanza de traballo con representantes das grandes compañías de distribución españolas, co fin de presentarlles a marca de calidade PescadeRías, de onde se non? que está a impulsar o departamento de Pesca e para poder coñecer de primeira man a súa opinión sobre esta iniciativa. Entre as cadeas de comercialización presentes nesta reunión atopábanse Gadisa, El Corte Inglés, Eroski e a Asociación de Cadenas de Supermercados (ACES).

Os asistentes ao encontro manifestaron a súa satisfacción
pola marca de calidade que está a piques de pór en marcha a Consellería de Pesca. Así mesmo, trasladáronlle á Conselleira e ao director xeral o seu desexo de apostar, de forma contundente, por “PescadeRías, de onde se non?” por dous motivos claros: pola diferenciación que vai supoñer a orixe do produto e porque as propias cadeas de distribución poderán ser certificadoras da marca sempre que sigan os pasos necesarios e cumpran coas especificacións requiridas para a acreditación das entidades certificadoras.

A Conselleira de Pesca pola súa parte adiantoulles aos representantes das distribuidoras que a posta de largo de “PescadeRías” terá lugar na primeira quincena de febreiro coa presentación da campaña publicitaria da marca. Carmen Gallego aproveitou para convidar a todos os asistentes ao devandito acto. Así mesmo, explicou que na segunda quincena de marzo verán a luz os primeiros produtos certificados coa marca de calidade “PescadeRías, de onde se non?”.

“PescadeRías”

A marca de calidade para os produtos da pesca de baixura que a Consellería de Pesca está a impulsar e o seu regulamento especifican que só poderán ampararse baixo o distintivo aqueles recursos procedentes da pesca e o marisqueo. Estes deberán ser frescos ou preparados, pero extraídos en augas da plataforma continental situada entre as liñas que marcan a desembocadura do río Miño e do Eo pola frota que sae e entra diariamente no porto e capturados con artes selectivas.

Así mesmo, os criterios que caracterizarán aos produtos amparados pola distintivo de calidade serán primeiramente a súa orixe galega e a súa procedencia da pesca artesanal. En segundo lugar, o tempo de desembarco dende a captura non superior ás 24 horas, e, finalmente, uns estándares mínimos de calidade.

Os grupos de especies amparados pola marca son as algas, moluscos (bivalvos, cefalópodos e gasterópodos), crustáceos, equinodermos e peixes. Deste xeito, quedan excluídos do regulamento os produtos da acuicultura e os da pesca procedentes de auga doce.

Os posibles usuarios da marca de calidade, é dicir, as posibles entidades certificadoras poderán ser: lonxas, centros de depuración/expedición, as cetarias de mariscos e os distribuidores de peixes e mariscos, que teñan as súas instalacións de manipulación ubicadas en territorio galego e que cumpran coas concesións, autorizacións, licenzas ou permisos que lles sexan de aplicación segundo as disposicións legais vixentes que regulan a súa actividade.