Investigadoras do CINBIO exploran novas estratexias terapéuticas para pacientes con trastornos do sistema inmune

O coñecemento do funcionamento das citoquinas pode ser, por tanto, fundamental para o posible desenvolvemento de novos tratamentos que melloren a calidade de vida das persoas que sofren este tipo de doenzas.

Partindo desta base nace o proxecto de investigación Magnet-Il-18, coordinado pola investigadora Verónica Salgueiriño, líder do grupo de Nanomateriais Híbridos do CINBIO, o Centro de Investigación en Nanomaterias e Biomedicina da Universidade de Vigo. A investigación arrancou a principios deste ano e, contando cun orzamento de 75.000 euros, prolongarase ao longo dun total de 18 meses, dentro do ‘Plan Complementario de Biotecnología Aplicada a la Salud’ en Galicia.

Xunto a Verónica Salgueiriño participan no proxecto as investigadoras do CINBIO Laura Maria Salonen, Julia N. Majcherkiewicz, Melodie Maceira Campos e Claudia Román Freijeiro, e a elas súmase tamén persoal investigador do Instituto de Investigación Sanitaria Galicia Sur (IISGS) e do Instituto de Biomedicina de Sevilla (IBIS).

Nanoestruturas magnéticas con aplicacións biomédicas

As nano e microestruturas magnéticas empréganse en biomedicina, en terapia celular e hipertermia magnética para a liberación de fármacos e en técnicas de imaxe. Seguindo esta liña, o proxecto Magnet-Il-18 ten por obxectivo a funcionalización de nanoestruturas magnéticas coa citoquina IL-18 e a súa internalización mediante procesos de endocitose ou mediante internalización forzada magneticamente, co fin de estudar a resposta inflamatoria das células.

“A nosa aspiración”, comenta Salgueiriño, “é correlacionar os resultados obtidos con datos de pacientes con trastornos do sistema inmune, como o VIH, con fin de explorar e presentar novas estratexias terapéuticas efectivas para este tipo de doenzas”. Para isto, as científicas do CINBIO implicadas neste proxecto traballarán na síntese, caracterización e funcionalización das nanoestruturas e nos ensaios celulares.

O proxecto supón para elas “unha oportunidade para traballar nunha contorna de aplicacións biomédicas, enfocándoas á correlación directa de resultados de nanoestruturas e ensaios celulares con datos de pacientes”, subliña Salgueiriño.

Fondos para terapias avanzadas en medicina personalizada

Magnet-Il-18 forma parte do Plan Complementario de Biotecnología Aplicada a la Salud, cofinanciado polo Ministerio de Ciencia e Innovación con fondos da Unión Europea NextGenerationEU; o Plan de Recuperación, Transformación e Resiliencia, e varias comunidades autónomas, entre as que se atopa Galicia. O seu obxectivo principal é o desenvolvemento de ferramentas para o diagnóstico, prognóstico e terapias avanzadas, ou dirixidas, en medicina personalizada.