A Universidade da Coruña e outras oito universidades europeas constitúen o consorcio estratéxico EMERGE

Asistiron ademais a esta reunión a vicerreitora de Internacionalización e Cooperación, Pilar García de la Torre, e a Adxunta de Proxección Internacional e Política Lingüística, Begoña Crespo. Nesta xuntanza reitores das nove universidades asinaron a declaración de principios sobre os que se articula o consorcio. 

Esta alianza de universidades europeas está formada por Université de Rennes2 (Francia), Université de Bretagne Sud (Francia), University of Limerick (Irlanda), Democritus University of Thrace (Grecia), Europa-Universität Flensburg (Alemaña), Innland Norway University of Applied Sciences (Noruega), Univerzita Mateja Bela (Eslovaquia), Neapolis University Pafos (Chipre) e a Universidade da Coruña, todas elas situadas en rexións periféricas de Europa.

A través de EMERGE, o consorcio fortalécese para poñer en marcha proxectos bilaterais e multilaterais, así como concorrerá conxuntamente a convocatorias de financiamento europeas. A xuntanza na University of Limerick, que tivo lugar a mediados deste mes, foi a primeira reunión persoal dos líderes dunhas universidades que contan conxuntamente con máis de 110.000 estudantes, e á cerimonia de compromiso seguiron tres intensos días de traballo para desenvolver e planificar a estratexia a longo prazo do Consorcio EMERGE.

Aínda que cada universidade ten diferentes culturas, idiomas e programas educativos, o consorcio ten como obxectivo construír unha estratexia conxunta a longo prazo coa finalidade de crear un cambio sistémico, estrutural e sustentable na forma en que operan e cooperar en beneficio das súas comunidades e partes interesadas.

O obxectivo fundamental é aumentar a inclusión e o compromiso deses territorios da periferia de Europa cos valores europeos e visibilizar a aportación das institucións de ensino superior destas rexións coa contorna socio-económica para contribuír ao seu desenvolvemento, formar unha cidadanía europea e xerar unha mellor calidade de vida. Subxace baixo este propósito a creación dun modelo de excelencia no ensino, a aprendizaxe e a investigación no que participarán como actores principais o alumnado, o persoal e a comunidade en xeral. Un ensino innovador, colaborativo, interactivo, baseado en retos, unha aprendizaxe plurilingüe que aumente a empregabilidade dos egresados, unha capacitación en habilidades brandas e a concienciación da importancia dos valores interculturais na comunicación entre comunidades de falantes diversas, son algúns dos pilares de EMERGE. A integración nun sentido amplo, a aceptación da diversidade e a inclusión das minorías constitúen tamén principios básicos e transversais dentro da alianza. A investigación en aberto, a creación de espazos de traballo colaborativo que impliquen a todas as partes interesadas desde o estudantado ata os profesionais e posibles empregadores, constitúe a base fundamental da colaboración universidade-empresa e das actividades de emprendemento que o consorcio ten intención de desenvolver. 

No plano da formación destaca a posta en marcha das microcredenciais, e a estruturación do coñecemento e as habilidades adquiridas polo alumnado ao longo da súa vida que se recoñecerá a través de ferramentas como o pasaporte das linguas ou o Europass. 

Colaboración, cooperación, respecto, integración, inclusión, ciencia en aberto, compromiso coa comunidade son trazos distintivos dun grupo de universidades localizadas nas marxes de Europa que dedicará os seus esforzos a cohesionar territorios e comunidades a través do coñecemento.