Pepe Solla leva a cociña galega á mesa do Cumio Europeo en Bruxelas

http://www.crtvg.es/informativos/pepe-solla-leva-a-cocina-galega-a-mesa-do-cumio-eurpeo

O prato principal, pescada con allada, ten un toque galego moi claro, de feito foi elaborado polo xefe de cociña Pepe Solla, que está en Bruxelas a supervisar todo o proceso.

En breve, en canto remate o xantar, está previsto que os líderes europeos manteñan un encontro co xefe de cociña galego e tamén co portugués que elabora o segundo prato e a sobremesa. É a primeira vez que se fai algo así nun cumio de xefes de Estado e de Goberno. España e Portugal propuxeron ofrecer este xantar para conmemorar os trinta anos da entrada destes dous países na Unión Europea. A esta hora deben estar xa case coa sobremesa. O prato principal era pescada con allada.

Atopamos o xefe de cociña Pepe Solla nos corredores do Consello Europeo acabado de chegar da cociña, de indicarlle ao equipo de cociñeiros da institución comunitaria que botaran máis sal o puré de tubérculos que acompañará a pescada con allada, o prato principal, receita de Solla, que degustan os líderes europeos.

"Busquei un prato que representara a Galicia. En todos os pratos que eu propuxen había un carácter galego", comentaba Solla desde Bruxelas.

As medidas de seguridade nos arredores do edificio onde se reúnen os xefes de Estado e de Goberno son moi estritas, tamén o son nos fogóns.

"Hai unha responsable de seguridade e hixiene que está a alí presente e nós temos unha limitación de que podemos facer dentro. Nós non podemos executar directamente, executan eles", asegura o xefe de cociña.

A institución europea controla, desde o punto máximo de cocción dos alimentos, ata a procedencia dos ingredientes e quen os manipula. Entre as propostas de xantar que rexeitaron no Consello, había un prato de polbo.

"Si escollen o meu prato principal, obviamente xa non podo facer segundo prato nin sobremesa, e o polbo era unha entrada", asegura Solla.

O xantar que ofrecen España e Portugal para celebrar os trinta anos da súa entrada na Unión Europea ía ser, inicialmente, unha cea. Pero a ese encontro non está convidada a primeira ministra británica. Os líderes falarán, os 27, do 'brexit'. Para que Theresa May puidese probar o menú galego e portugués, optaron por facer un xantar maridado con viño albariño Rías Baixas e tinto da Rioxa.